En concreto, vanse incorporar tres médicos de familia para reforzar a Atención Primaria nos centros sanitarios de Covelo, Arbo e Ponteareas e cinco pediatras para os de Tui, que terá dous novos especialistas no ámbito infantil, Tomiño, Ponteareas e un compartido para os centros de saúde de Covelo e Mondariz.

“O reforzo en materia de saúde é fundamental para garantir estabilidade e tranquilidade á veciñanza. No noso centro de saúde contamos con moi bos profesionais que se esforzan en mellorar o servizo e achegarse á cidadanía para coñecer as súas necesidades. Ademais, gustaríame salientar o empeño que poñen para formar ás persoas en cuestións sanitarias, de hixiene e bos hábitos tanto alimenticios como de actividade física. Unha cuestión moi importante que pode atallar pequenas doenzas e mellorar a vida das persoas”, explica o alcalde.

Pablo Castillo aproveitou o encontro para volver pedir a implantación dun segundo médico de atención e o incremento dos días de atención do servizo de pediatría así como a necesidade de continuar mellorando as instalacións do centro e do material médico

Pola súa banda, o delegado territorial manifestaba que “dende Galicia estamos a actuar co máximo inxenio e esforzo, tanto normativo como económico, para ser a primeira comunidade que adopta e consegue solucións fronte a falla de médicos de Atención Primeira e de pediatras que afecta a toda España. E dende o Sergas estamos a conseguilo paseniñamente con diversas medidas, entre as que figuran os novidosos concursos de méritos e outras que estamos a negociar cos profesionais, porque para a Xunta o máis importante é darlle a cobertura sanitaria axeitada aos galegos”.