- A iniciativa, desenvolvida en colaboración con Sogama coincidendo co Día Europeo da Agricultura Ecolóxica, busca reducir os residuos depositados no colector verde.
- As persoas participantes asistiron a un curso práctico de formación impartido no Auditorio Municipal para garantir o éxito do proceso de compostaxe.
Covelo, 25 de setembro de 2026. O Concello de Covelo celebrou este venres no Auditorio Municipal unha nova xornada de entrega de composteiros domésticos e formación presencial, consolidando o seu compromiso coa sustentabilidade e a economía circular. Esta actuación enmárcase dentro do IX Programa de Compostaxe Doméstica, impulsado polo goleo local en colaboración coa Sociedade Galega do Medio Ambiente (Sogama) con motivo do Día Europeo da Agricultura Ecolóxica.
A través desta nova fase do programa, o Concello facilitou un total de 20 novos composteiros xunto cos seus correspondentes manuais informativos. O obxectivo principal é que as veciñas e veciños con vivenda que dispoñan de horta ou xardín poidan valorizar os restos orgánicos xerados nos seus propios fogares, transformándoos nun abono natural de excelente calidade mentres se reduce de forma drástica a cantidade de lixo que se deriva ao colector xenérico.
Para asegurar o correcto funcionamento da técnica composteira, a entrega estivo complementada cun curso formativo dunha hora de duración impartido no propio auditorio. Nel, persoal especializado explicou de forma sinxela e práctica cales son os materiais aptos para introducir no recipiente, o control óptimo da humidade e a aireación, e os pasos necesarios para obter un bo compost.
Con esta nova achega, o Concello de Covelo reafirma a súa estratexia de desenvolvemento sostible, fomentando prácticas tradicionais adaptadas aos retos ambientais actuais e axudando a veciñanza a adoptar hábitos de vida máis ecolóxicos e respectuosos co medio natural. As persoas interesadas en obter máis información sobre futuras edicións poden consultar os detalles e avisos a través da web oficial do Concello de Covelo
