A partir das 20:30 horas de mañá xoves o auditorio municipal de Covelo abrirá as súas portas para seguir a gala retransmitida por streaming. Os Premios de Teatro María Casares, organizados pola Asociación de Actores e Actrices de Galicia, entregaranse este xoves, 21 de marzo, no Teatro Rosalía de Castro da Coruña a partir das 20.30 horas. A gala de entrega será un homenaxe ao “teatro musical” con “mar de fondo” no que os elementos marítimos serán unha constante sobre o escenario.

Laura, de tan só 31 anos, compite na categoría ao mellor texto orixinal coa obra A Nai, unha produción de Amorodio Teatro, compañía formada por Carmen Facorro e Javi Castiñeira. Na mesma categoría están nomindos os espectáculos Códice K, de Ainé e Mosca, de Ártika Cía.

A Nai é o segundo traballo da dramaturga covelense no circuíto profesional. Esta obra, escrita íntegramente por Laura Porto conta a historia das tres irmás Touza de Ribadavia que nos anos 30 e 40 axudaron a fuxir do nazismo a arredor de 500 persoas perseguidas. Ademais de relatar a vida destas afoutadas irmás a obra visibiliza o importante papel das mulleres e a crianza ademais de abordar a crise migratoria actual.

Laura Porto compaxina o seu traballo de dramaturga co perfil de técnica e mesmo directora, ademais de realizar traballos de xestión cultural e impatir clases.