Rueda destacou hoxe en Covelo o novo récord de prazas e de participación que acadou a campaña de campamentos de verán da Xunta este 2023, superando as 11.200 prazas e rozando o 100% de ocupación. “Galicia é, con moita diferenza, a comunidade autónoma que ofrece máis prazas en campamentos durante os meses do verán”.

Durante a visita, Rueda subliñou o compromiso da Xunta con este tipo de iniciativas que “son unha oportunidade” para facilitar a conciliación familiar. O presidente lembrou que o Goberno autonómico destina “máis de 4 millóns de euros” a campamentos este ano, co obxectivo de que nenos e nenas de entre 10 e 14 anos desfruten de estadías de cinco días en doce establecementos hostaleiros da comunidade. Trátase de iniciativas nas que os máis pequenos poden adquirir competencias e valores como o compañeirismo ou a sensibilización co medio ambiente.

Pola súa banda, o alcalde de Covelo, salientou as bondades da comarca da Paradanta onde poden aprender inmersos no medio natural e destacou que esta experiencia permite descubrir a familias de toda Galicia a beleza natural do concello. Por último, Castillo insistíu na importancia de apoiar a conciliación familiar e laboral e convidou a todas as nenas e nenos participantes a volver a Covelo coas súas familias para seguir descubrindo recunchos fermosos.