Parte da adolescencia e xuventude de Gil transcorreu na parroquia da Lamosa, na casa cuartel da Garda Civil, onde o seu pai estivo destinado entre 1881 e 1890. Alí asistiu á escola de Paredes. O ronsel de Gil na Lamosa constátase a través dunha fotografía publicada na revista Vida gallega (25/3/1921) co pé de foto: “En Lamosa obsequian a los viajeros las relaciones de la patria local de Gil”.

José Gil na Lamosa en 1921 (Covelo)

Coas actividades que nutren esta xira preténdese amosar aos veciños e veciñas das vilas coas que Gil tivo algunha relación na súa andaina persoal e profesional, a importancia do traballo, o talento e o legado do auténtico precursor do cinema galego, inxustamente esquecido.

Preténdese tamén achegar aos rapaces e rapazas, estudantes de Covelo neste caso, a memoria e o arquivo do cinema máis inicial, aquel que se estaba a crear en Galicia ao tempo que nacía esta arte ao longo de todo o mundo. Para a xeración do audiovisual, os nenos e nenas que nacen e medran rodeados de pantallas e con milleiros de contidos accesibles, está resultando toda unha experiencia asistir aos encontros, proxeccións e coloquios arredor de Gil e o seu tempo.

Chegamos a Covelo este venres 14 e sábado 15 de abril con proxeccións, a presentación do libro "Nos días encantados de agosto", de Manolo González (Ed. Galaxia), coloquios e música, nunha sesión vermut na que a Banda de Música de Rubiós, berce de José Gil, interpretará temas que nos van levar a outro tempo, aínda que semelle o contrario, non tan afastado do noso.

A Covelo arribará tamén o CINEMÓBIL Nº3, museo itinerante a partir do que a explicación sobre a vida e a obra de Gil gaña outra dimensión.