Este sábado día 5 de 10 a 14 horas na praza Mestre Cerviño gozaremos dunha nova cita coa mostra de artesanía na que poderemos atopar produtos téxtiles, xoiería, prantas, decoración, cerámica polimérica, cosmética natural, pan artesán, cervexa artesán, horta ecolóxica, cestería, pintura, maquetería, helicicultura, instrumentos musicais de madeira, xoguetes, libros e un sinfín de produtos de primeira calidade.

Completa a oferta os postos de segunda man nos que, previa petición ao Concello, as persoas poden vender aqueles artigos que xa non precisen.

A partir das 12 horas haberá un obradoiro infantil para crear caveiras móbiles e seguir festexando o Samaín.

A novidade desta edición chega da man do magosto popular ás 14 horas no que poderemos gozar das castañas con choripán aderezadas da música das pandereteiras do Suído e As Ferriñas da Guía que ademais de animar o magosto, porán música a toda a mañá de compras e festa. Ademais, os bares da contorna da praza ofrecerán polbo á feira, callos, hamburguesas e unha ampla variedade de bocadillos, entre outras especialidades da carta.