A delegada de zona de Solidariedade Galega co Pobo Saharaui, Conchi Fernández, quixo acompañar a esta familia galego-saharaui que por vez primeira participaba no programa “Vacacións en Paz”.

Vacacións en Paz é un proxecto de acollida temporal de nenos e nenas saharauís durante os meses de xullo e agosto , que en Galicia desenvolve Solidariedade Galega co Pobo Saharauí (SOGAPS), a petición expresa do goberno da República Árabe Saharauí Democrática (RASD).

Galicia vén participando nesta iniciativa solidaria desde o ano 1991, ofrecendo ás familias saharauís a posibilidade de que as súas fillas e os seus fillos gocen dunha estancia agradable, humana e culturalmente rica, baixo a supervisión e os coidados das familias acolledoras galegas.

Este programa conta coa colaboración económica da Xunta de Galicia, e o apoio dos concellos, ademais a asistencia sanitaria é posible grazas a un convenio entre SOGAPS e Sergas que se suman aos múltiples convenios que a Solidariedade Galega co Pobo Saharaui ten con ocultistas, ópticas, dentistas...

O alcalde de Covelo recoñeceu o importante papel que xogan as familias que amosan o seu lado máis solidario proporcionando durante dous meses un fogar a estas nenas e nenos que naceron no exilio no medio dun clima de guerra e que, en Galicia, teñen a oportunidade de coñecer formas distintas de vida.

Conchi Fernández, pola súa parte, suliñou que grazas á implicación das familias reciben asistencia médica e de alimentación, transmitindo tamén valores de tolerancia e sendo un exemplo de convivencia e integración de todas as persoas na comunidade.